| Главная » Статьи » Shou biznes olami |
ШОХРУХ ХОН: "ЎЗИНГ БАХТЛИ БЎЛОЛМАСАНГ, ЎЗГАНИ БАХТЛИ ҚИЛОЛМАЙСАН!"
 Самар, Мира ва Акира…«Ҳали ҳаёт эканман” фильми айнан шу учликни муҳаббат ипига боғлайди. Улар ишқ йўлида эсидан оғади, ёнади, дардга ботади, айрилади ва яна учрашади! Нью-Йоркнинг қоқ марказидаги Эмпайр IMAX кинотеатрида Яш Чопранинг энг сўнгги фильми премьераси бўлиб ўтди. Сайтимиз ушбу илк намойишнинг махсус меҳмони бўлди. Шундоқ "Мадам Тьюссо” музейи олдида жойлашган ушбу кинотеатр мухлисларга гавжум. Кинотеатрнинг ичида фильм афишалари жой олган. Зал томошабинга лиқ тўлди. Кўзлар катта экранга қадалган. Интиқ кутилган лаҳзалар. Фильм бошланди. Шохрух Хон ўша-ўша. Мимикалар, ҳаракатлар доимгидай. Унга хос бўлган ҳазилкашлик ва бир пайтнинг ўзида жиддийлик ҳам ўзгармаган. Лондонда чойчақа учун турли-туман майда ишлар билан тирикчилик қиладиган оддий йигит қобилиятли ҳам. У яхшигина куйлайди. Гитара чалиб, ўтган-кетганнинг ташлаган тангаларини йиғадиган Самирга бойнинг қизи Мира (Катрина Кэйф) ошиқ бўлади. Аслида уларнинг биринчи кўз тўқнашуви, йигитнинг шаҳар марказидаги черков ҳовлисида, қорли кунлардан бирида кечади. Мира отаси танлаган куёвга турмушга чиқиши керак. Ахир, онаси ташлаб кетганидан бери Мирага отасидан бўлак меҳрибон йўқ. Унинг барча инжиқликларини ота кўтариб келган. Энди биргина орзуси ўз қўлида ишлайдиган инглиз йигитга қизини турмушга бериш. Қизнинг кўнглида эса ота танлаган йигитга нисбатан муҳаббат йўқ. ...Самир Мирани рақс кечасига таклиф этади. Кўнгиллар боғланади. Севги риштаси илдиз отади. Хуллас, воқеалар ривожи анча давом этади. Мира Самирга ўзи севги изҳор этади ва бир куни ўзи воз кечади... Картинани бошидан охиригача гапириб ўтиришни лозим топмадим. Эснаб қолишим мумкин... Хулоса ўрнида шуки, ушбу фильм Яш амакининг бошқа фильмларига қараганда, жуда бўш кўринади. На фалсафа, на дард, на эмоционал жунбушга келтирувчи диалоглар... Шунчаки номига ё зерикканда нима қилишни билмай яратилгандек. 8 йил олдинги "Вир ва Зара”нинг бир лаҳзасига ҳам ушбу картинани алмашмаган бўлардим. Яна ёшлар қизиқишини ошириш учунми, очиқ-сочиқ саҳналар талай. Катрина Кэйф ва Анушка Шармани деярли ёпиқ кийимда кўрмайсиз. Лондон тарбиясини олган ҳамма қиз ҳам бундай ярим-ялонғоч аҳволда юрмайди-ку, ахир. Устига-устак, ҳинд қизи. Яна энг ғалатиси, фильмда биронта синдур сурган аёл образини кўрмайсиз. Замонавий кинода обрў қозонаман дея ҳинд киноси тобора ўзини йўқотиб бораётгани ачинарли... Картина қўшиққа тўла. "Saans” қўшиғини инобатга олмаганда, бошқа хит бўладиган биронта хониш йўқ. Сценарий жуда саёз ёзилган. Миранинг илтимосига биноан Лондонни тарк этган Самир ўз туғилган жойи Кашмирга қайтиб, қуролли кучлар сафида хизмат қилади. Вазифаси бомбани хавфсизлантириш. Тинмай бомбага дуч келаверишидан, тавба, Покистоннинг энг гўзал тоғли ва ўрмонли ўлкаси бомбага тўлиб кетганмикан деган фикрга келасиз. Журналист қиз Акира (Анушка Шарма)нинг ҳаддан зиёд шўхлиги, типир-типир қилиши энсангизни қотиради... Бўса саҳналари ва яна ундан "ортиқроқ” ҳолатлар ҳам жуда сохта кўрсатилган. Хуллас, кинонинг таъсир даражаси томошабинни воқеаларга боғлаб ололмайди. Нима ҳам дердик, Яш Чопрадан бундан кўпроғини кутгандик: кўпроқ дард, мазмун ва фалсафага бой фильм! Тўғри кадрлар романтикага жуда бой. Диалогларда ҳам бир-икки таъсирчан фикрлар учрайди. Бироқ, бунча шов-шувли рекламадан сўнг узоқ кутилган орзиқиш ўзини оқламайди...Нималардир камлик қилади. Фильмда Шохрух Хон образи тилидан фақат бир гап шахсан менга жуда ёқди: "Ўзинг бахтли бўлолмасанг, ўзгани бахтли қила олмайсан!” Катрина Кайф умуман йиғлашни билмайди! Эҳтиросли қарашдан бошқасини ҳам биладими бу қиз?! Анушкада узун оёқлардан бошқа ҳеч нарса йўқ. "Йўқ” нарсани кўрсатишга уриниш шартмиди?! Шохрух Хоннинг қаригани тобора сезиляпти. Образларини яратишдаги бирхиллик эса гоҳида бездиради... Фильм "бомба”ларда тозаловчи йигитнинг бир неча автоҳалокатга учраб, хотирасини вақтинча йўқотиб, яна қайта тикланишидан сўнг муҳаббатига эришиши билан якунланади. Бироқ, унинг ва севгилисининг ёши энди 40 да эди! ) ("Вирва Зара”нинг замонавий талқини!) Ниҳоят, воқеалар тугади. Қора экран ва бирдан режиссёр тириклигидаги фильм яратилиш жараёнлари намойишини бошлайди. Ҳазиллар, кулгулар, ишлаш жараёни...Яш Чопра ям-яшил ўтлоқда узоққа тикилиб турган сўнгги кадр унинг сўнгги фильмига интиҳо ясайди. Кимда қандай таассурот билмадим-у, бироқ, томошабинларда катта ҳайратни топиш жуда амримаҳол эди. Балки, вақт жуда алламаҳал бўлгани учундир? ) Фильм ҳақиқатан зерикарли...Чарчаб томоша қилсангиз, ухлаб қолишингиз ҳам мумкин. Аччиқ ҳақиқатларни ёзишга мажбур бўлдим. Борини ёзмасам, сизни ҳам, ўзимни ҳам алдаган бўламан. "Yashrajfilms”дан эса кескин танқидлар учун узр сўрамайман, гоҳида мақтовдан ёғ босган кўзларни чин гаплар очади... Жасур ҲАМРОЕВ НЬЮ-ЙОРК, АҚШ  ЯШ ЧОПРАНИНГ ЭНГ СЎНГГИ ФИЛЬМИДАГИ ЭНГ СЎНГГИ КАДРИ! | |
| Просмотров: 1150 | |
| Всего комментариев: 0 | |